சீனாவில் குடுகுடுப்பைக்காரன் : பெய்ஜிங் உணவு - பாகம் 2

பாகம் 1

இந்த பதிவில போட்டோ போடலாம்னு நெனச்சு கோடக்கேலரிய ரெண்டு வருசத்துக்கு அப்புரம் லாகின் பண்ணி பாத்தா ஒரு ஆல்பத்தையும் காணோம், வீட்ல போயி பேக்கப் ஹாட்டிஸ்க் முழுவதும் தேடிப்பாத்துட்டேன் அங்கேயும் காணோம்.சீனப்பயணத்துக்கு அடையாளமா ஒரு போட்டோ கூட இல்ல அதுனால என் அனுபவத்தை மட்டும் எழுதறேன்.இந்தப்பகுதி முழுவதும் உணவு, கண்டிப்பாக சீன உணவு சீனாவில் வேறு சுவை.இங்கே அமெரிக்காவில் அமெரிக்கப்படுத்தப்பட்ட சீன உணவுக்கும் அதற்கும் நிறைய வித்தியாசம்

நான் பார்த்து பேசிய வரை அல்லது எனக்கு புரிந்தவரை அரசியல்/மதம் விசயத்தில் யாருக்கும் அக்கறை இல்லை. பெரும்பாலனாவர்களுக்கு அன்றைய பிழைப்பு உணவு இது தாண்டி ஒன்றும் யோசிக்க நேரமில்லையாகவும் இருக்கலாம்.

உணவுப்பிரியனான நான் முதலில் சாப்பிட நினைத்தது பீஜிங் டக், சாங்க்பிங்க் ஏரியாவில் உள்ள ஒரு உணவகத்தில் நானும் என்னுடன் வந்த சீனரும் பீஜிங் டக் ஆர்டர் செய்தோம். ஒரு முழு வாத்தை ஏதோ மசாலா தடவி எண்ணெயில் வறுத்து நம் கண் முன்னால் ஒரு டிராலியில் கொண்டு வந்து நிறுத்தினார்.பின்னர் சிறிய துண்டுகளாக நாம் சாப்பிடும் வரை வெட்டி தட்டுகளில் வைத்தார், தொட்டுக்கொள்ள மிளகு,உப்பு ஏதோ சீன மசால கலந்த ஒரு பொடியில் தொட்டு சாப்பிட்டால் சுவை ஆஆஆஆஆஆஹாஹாஹாஹா.ஒரு முழு வாத்தையும் இருவரால் சாப்பிட்டு முடிக்க இயலவில்லை, பார்சல் கட்டி ஹோட்டல் அறையில் இரவு உணவுக்கு மிச்சம் உள்ள வாத்து சரியாக இருந்தது.

நண்பர்களின் எச்சரிக்கையினால் தங்கியிருந்த இடத்தின் மேற்குப்பகுதியில் உள்ள உணவகங்களுக்கு செல்லவில்லை,அங்கே ஆமை ரத்தத்தை பச்சையாக குடிப்பார்களாம், பின்னர் சமைத்து சாப்பிடுவார்களாம்.நமக்கு இன்னும் அந்த அளவு சகிப்புத்தன்மை வரலை.முடிந்த வரை தங்கியிருந்த இடத்தில் காலை உணவு பல நேரங்களில் அரிசி கஞ்சி வாங்கி சாப்பிடுவேன், மதியம் பல சுவைகளில சிக்கன்,நூடுல்ஸ் ஆகவோ பிரையாகவோ, சில நேரங்களில் டம்ப்ளிங்ஸ். டம்ப்ளிங்ஸ் நல்ல சுவை.பல நேரங்களில் மீன்.

நான் தங்கியிருந்த நேரத்தில் பஞ்சாபி தம்பதிகள் அங்கு இருந்தனர்,ஒரு சிரியன் அவர் சீனம் நன்றாக பேசுவார், அவர்களும் நல்ல உணவுப்பிரியர்கள் அவர்களோடு சேர்ந்து ஒரு நாள் ஒரு உணவகத்தில் இரால் வருவல்,மீன் மற்றும் சிக்கன் பல பெயர்களில் சாப்பிட்டோம்.உயிரோடு தொட்டியில் இருக்கும் இரால் மீன்களை நம் கண் முன்னால் பிடித்து எடை போட்டு அப்படியே இரண்டு நிமிடம் கொதிக்கும் நீரில் அவித்து ஒரு கிலோ காஞ்ச மிளகாய் மற்றும் சில சீன மசாலா உப்போடு சேர்த்து வறுத்து கொடுத்தார்கள்.மிளகாய்க்கு இடையில் உள்ள இரால்களை பொறுக்கி சாப்பிடவேண்டும், மிளகாயை கொட்டிவிடுவார்களாம்.

பஞ்சாபி மேடம் இரால் சுத்தப்படுத்தி அப்புரம் வறுக்க மாட்டீங்களான்னு கேட்டாங்க, முடியாது அதுக்கு ரெண்டு மணி நேரத்துக்கு மேலே ஆகும் அப்படின்னு சொல்லி மறுத்துட்டாங்க. இரால் சாப்பிட நல்லா ஜீஸுயா இருந்துச்சு, அவங்க யாரும் இரால் சரியா சாப்பிடலை மீண்டும் நானே பேக்கிங், சும்மா சொல்லக்கூடாது சுவை அருமை.

மீன் உணவு மின் வருவல் கிட்டத்தட்ட நம்மூரு மாதிரிதான், அதுவும் உயிரோட பக்கத்துல உள்ள தொட்டில நீந்திகிட்டு இருக்கும் நாம மீன காமிக்கனும் உடனே சமையல்தான். அதுல பீஜிங் ஸ்டைல் பிஷ்னு ஒரு மெனு, மிளகாய அரைச்சு ஊத்தி காரம்னா தாங்க முடியல ஆனா மீன் ருசிதான், அப்புரம் ஒரு நாள் நம்மூரு குளத்து கெளுத்தி மாதிரி ஒன்னு நான் உடகாந்திருந்த டேபிள் வெச்சே குழம்பு வெச்சு தந்தாங்க தனியா ஆடுனாலும் அடிச்சு ஆடுனேன்.

மற்றொரு நாள் நண்டு உயிரோட இருந்த ஒரு பெரிய நண்டு ஆர்டர் பண்ணினேன், சமைச்சு அந்த ஓட்டயும் கொண்டு வந்து வெச்சாங்க கூடவே வழக்கமா குடுக்குர ரெண்டு குச்சி, இத வெச்சு எப்படி நண்டு சாப்பிட முடியும்,அப்புரமா ஒரு கத்தியும் கைக்கு ஒரு பிளாஸ்டி உறையும் கொடுத்தாங்க, நானும் வெட்டிப்பாத்தேன், ம்ஹீம் நமக்கு கையில எடுத்து கடிச்சு சாப்பிடனும். பாத்தேன் பார்சல் பண்ண சொல்லி நிம்மதியா அறைல வந்து பிரிச்சு மேஞ்சாச்சு. நான் சாப்பிட்ட நண்டுகளில் சுவையான நண்டுகளில் இதுவும் ஒன்று.

ஒரு கொரியன் உணவகத்தில் ஒரு நாள் சைவ பஜ்ஜிக்களும், மட்டன் ப்ரை கொஞ்சம் சுட்ட மீன் சாப்பிட்டேன் இது நம்ம பஞ்சாபிகாராரோட போய் சாப்பிட்டது,இவைகள் சீன உணவோடு கொஞ்சம் மாறுபட்டு இருந்தது, விலை மிக மலிவு மூனு பேருக்கு 75 யுவான் தான், நான் சாப்பிட்ட நண்டு மட்டும் 275 யுவான்.

பஞ்சாபிகாரருக்கு சீனாவில் தெருக்கடைகளில் சாப்பிட ஆசை அவரோடு சேர்ந்து தெருக்கடைகளில் விற்கும் சிக்கன் வருவல், மீன் வருவல்/பஜ்ஜி எல்லாம் சாப்பிட்டேன் சில கடைகளில், இது மாலை நேர உணவு, சுகாதாராம் சென்னை ரோட்டுக்கடைகளுக்கு கொஞ்சமும் சளைத்ததல்ல அதே போல் சுவையும்.

பீஜிங் டக் சாப்பிட்ட ஓட்டலில் விலாங்கு மீன் பார்த்தேன் ஆனால் அங்கே மீண்டும் செல்ல வாய்ப்பு இல்லை, அந்த வருத்தம் இன்னும் உள்ளது.அங்கே இருந்த kfc போன்ற அமெரிக்க உணவகங்களில் நான் ஒருநாளும் சாப்பிடவில்லை, மொத்தத்தில் உணவு விசயத்தில் சீனாவில மிக திருப்தியாக சாப்பிட்டேன்.இந்தியா கிச்சன் என்ற இந்திய உணவகத்திற்கும் செல்லும் வாய்ப்பு அமையவில்லை.

அடுத்து கிரேட்வால், forbidden city மற்றும் palace சென்ற அனுபவம்...