பல்லவர்களுடன் ஒரு அனுபவம்:

மு:கு : இது ஒரு மீள்பதிவு

முன்னொரு நாள் சோழ நாட்டில் ஒரு சிறிய கிராமத்தில் கதையின் நாயகன் தொடக்கப்பள்ளியில் இருந்து உயர் நிலைப்பள்ளியில் சேர்ந்த மகிழ்ச்சியில் மணியாபியம் விளையாடிக்கொண்டிருந்தான்.

ஆபியம் தந்த மகிழ்ச்சி நீடிக்கவில்லை, தவறி விழுந்ததில் முன் பல் அடிப்பட்டு நொறுங்கியது,கடுமையான வலி.

அதே பள்ளியில் ஆசிரியராக பணிபுரியும் நாயகனின்(நான்) தந்தையிடம் சக மாணவர்கள் கூட்டிச்சென்றனர். அவரும் தன்னுடைய பாசத்தை என் கன்னத்தில் ஒரு அறை விட்டு காண்பித்து பல் டாக்டரிடம் அழைத்துசென்றார். பல் பாதியானாலும் அப்போதைக்கு பிரச்சினை சரியானது..

சில வருடங்களுக்கு முன் சென்னையில் அப்பா கொடுத்துக்கொண்டே இருந்த பணத்தை வைத்து வேலை தேடிக்கொண்டேஏஏஏஏஏஏஏ ருந்தபோது, அந்தப்பல் வலிக்க ஆரம்பிச்சது.

வாடகை, டீ, தங்க வடிப்பான்,மற்றும் ஓரிரு வேலை உணவுக்கே சிங்கி அடிக்கும் நிலையில் இலவச பல் சிகிச்சை எங்காவது கிடைக்குமான்னு தேடினேன்.

நண்பர் VHS ல பார்க்கலாம்னு சொன்னான். VHS போன் பண்ணி கேட்டப்ப, ராதாகிருஷ்ணன் சாலையில் உள்ள ராகாஸ் டெண்டல் காலேஜ் போகச்சொன்னங்க.

நானும் என் நண்பனும் அடுத்த நாள் அங்கே.

ராகாஸ் டெண்டல் காலேஜ், இரண்டாமாண்டு அல்லது மூன்றாமாண்டு மாணவர்கள் என்னுடைய பல்லை செக் பண்ண தயார் நிலையில் குறடு மற்றும் கிடுக்கிகளோடு.

அழகிய பல் வரிசை கொண்ட ஒரு அழகிய பல்லவி என்னை "ஆ" சொல்லுங்க , "ஈ " சொல்லுங்கன்னார். நானும் ஆஆஆஆஆ, ஹிஹிஹிஹி சொன்னேன்.

வரிசையாக பல வருங்கால பல்லவர்கள்/ பல்லவிகள் ஆ, ஈ சொல்லசொல்லினர்.என்னமோ குறிப்பு எடுத்துக்கொண்டனர்.

லேட்டரல் <எனக்கு சரியா தெரியல> அப்செஸ்,
< எனக்கு சரியா தெரியல> அப்செஸ்,
மற்றும் சில அப்செஸ்களை டயாக்னோசிஸ் ஆ சொன்னாங்க.

கடைசியா பாடம் எடுக்கிற பல்லவ பேரரசர் வந்தார். ஆ,ஈ சொல்ல சொன்னார். மாணவப் பல்லவர்கள் சொல்லாத ஒரு அப்செஸை டயாக்னோசிஸா சொன்னார்.

என்னைத்தவிர அனைவரும் ஹிஹிஹிஹி,

நண்பர் அனைத்தையும் நோட்டம் விட்டபடியே இருந்தான்.

கொஞ்சம் pus வெச்சிருக்கு, ரூட் கெனால் சர்ஜரி பண்ணிதான் சரி பண்ணனும்னு சொன்னார். தரமணி VHS ல இருக்கிற ராகாஸ் டெண்டல் காலேஜ் MDS மாணவர்கள் அறுவை சிகிச்சை செய்வார்கள் என அங்கே செல்ல பரிந்துரைத்தார்.

சரின்னு சொல்லிட்டு வெளில வந்தோம், நாயர் கடையில் கொஞ்சம் சக்கரை வெந்நீர் குடிச்சிட்டு , தங்க வடிப்பான் பஞ்சு கையை சுட்டதும், கீழே போட்டுவிட்டு நண்பன்.

“டேய் learn dentistry in 24 hours, dentistry for dummies” மாதிரி புத்தகம் எல்லாம் ஒன்னும் இல்லையாடான்னு கேட்டான்.கத்துகிட்டு நாமலே சர்ஜரி பண்ணிடலாம்னான்.

இவர் பொறியியல் கல்லூரியில் படிக்கும்போது நல்லபாம்பு,நட்டுவாக்கலிகளுக்கு சர்ஜரி பண்ணிய முன் அனுபவம் உள்ளவர். இவரின் சர்ஜரி நிறைய பேரின் உயிரை காப்பாற்றியிருக்கிறது சர்ஜரி செய்துகொண்டவர்கள் இறந்து போனதால்.நல்லவேளை அப்படி எல்லாம் புத்தகம் இல்லை.

அடுத்த நாள் தரமணி VHS ல இருக்கிற ராகாஸ் டெண்டல் காலேஜ் போனோம், MDS படிக்கிற பல்லவர் பார்த்துட்டு, ரூட் கெனால் சர்ஜரி பண்ணிடலாம், நீங்க ரூ-30 பீஸ் VHS க்கு கட்டிருங்கன்னு சொன்னார். நல்லபடியா மிகவும் சிரத்தையுடன் ரூட் கெனால் சர்ஜரியும் பண்ணினார்.
அவரை நம்பியதற்கு எனக்கு நன்றி சொன்னார்.நானும் சைகையில் நன்றியைதெரிவித்துக்கொண்டு விடை பெற்றேன்.

வீங்கிய வாயுடன் ஒரு வாரம், முப்பதே ரூபாய் செலவில் என்னுடைய பல்வலியும் சரியானது, இந்த வாரத்தில் கிட்டதட்ட நாள் ஒன்றுக்கு 25 ரூபாய் செலவும் குறைந்தது. நான் செய்ய நினைத்த வேலையில் முன் அனுபவம் எனக்கு இல்லாமல் இருந்தாலும் யாராவது என்னை நம்பி வேலை கொடுப்பார்கள் என்ற நம்பிக்கையும் இதன் மூலம் பிறந்தது.

அந்த அழகிய பல்லவியை மீண்டும் பார்த்தா ஹிஹிஹி சொல்லலாம்னுஆசையாதான் இருக்கு. ஆனால் குந்தவை நாச்சியார் மீண்டும் MDS பல்லவர பார்க்க வேண்டி வரும்கிறார்.

பி,கு : (<எனக்கு சரியா தெரியல> = பல்லவர்களும்/பல்லவிகளும் ஏதோ மருத்துவபேரு சொன்னாங்க எனக்கு மறந்து போச்சு)

இது ஒரு மீள்பதிவு